我的箍牙日記 - Invisalign印模

考慮咗一個星期後，決定用Invisalign，打去clinic book印模時間。係，要再印模的，因為上次印係for醫生做評估同分析，今次就係比美國invisalign公司做clincheck，即係電腦模擬，ok咗先真係做套牙模。

今次印模過程同上次差唔多，都係上下顎加bite，不過時間就耐D，護士話係因為物料唔同，要寄去美國所以d物料要set得硬d，而且今次明顯地印得好小心，醫生都有睇住同幫手。成個過程大約45分鐘。走嘅時候醫生都有問我ok唔ok，可能因為見我印模嘅時間有D反胃（尷尬，都係唔係好忍到D膠好似流緊入喉嚨果種感覺）。=P 建議如果你哋就嚟會做印模，其實放鬆少少用鼻呌氣就會順利好多，唔好太緊張。

接住宜家要等兩星期clincheck返來再見醫生。exciting =)

我的箍牙日記 - 印模和療程分析

上回講到做咗consultation後決定喺呢位醫生度箍牙，跟住就係番去照x-ray同印模。因為約咗早上的關係，去到clinic無咩人。照x-ray過程好快，影咗一張180度的，另側面兩張。印模過程就比較長，印咗上下排牙齒同bite共三個模。印模過程有少少唔舒服，當D膠塞入口時唔可以吞口水，D膠有少少頂到喉嚨會有好想吐番出嚟嘅感覺，成個過程大約15分鐘，都係由護士負責。是次費用3000元。

大約一星期後再上clinic見醫生，醫生拎咗牙模同x-ray片再同我解釋佢建議的療程。同consultation時講的都一樣，會幫我D牙箍番U型，由於我的嘴型冇改變的需要，唔需要拔牙，但就有機會磨牙。佢有兩個療程選擇給我考慮，一是傳統牙箍，二是Invisalign，兩個療程的價錢、時間、同payment schedule都唔一樣，完成後所用的retainer都有分別。醫生print咗兩個療程的詳細資料俾我番屋企再考慮。其實我個心一早已經決定要箍Invisalign，因為三十歲人先嚟箍牙，真係唔可以接受一排鋼牙咁番工見人lol。不過番屋企再仔細閱讀一下D細節都係好嘅。